1/3/2001

Ասույթներ

 

 

Տիեզերքը Աստծո մտահղումն է:

 

Եվ իդեալական այդ ոգեպատկերի իրականություն մուտք գործելուց հետո, բոլոր մտածող էակների կոչումն է, առկա այդ ամբողջի մեջ վերագտնել նախնական ուրվապատկերը` Երևույթի մեջ փնտրել օրենքը:

 

Ամեն բան ինձնում սոսկ հիերոգլիֆն է ուժի, որ նմանակերպ է ինձ:

 

Ես խոսակցում եմ անսահմանության հետ բնության գործիքի միջոցով, համաշխարհային պատմության միջոցով:

 

Մարդկային հոգու յուրաքանչյուր իրավիճակ որևէ այլաբանություն ունի նյութական արարչության մեջ, որով էլ այն հատկանշվում է:

 

Կենսունակ գործունեությունը մենք անվանում ենք կրակ, Ժամանակը հոսք է, որ գլորվում է սրընթաց, Հավիտենականությունը շրջան է, Գաղտնիքը քողարկվում է կեսգիշերին:

 

Իսկ ճշմարտությունը բնակվում է Արեգակում:

 

Յուրաքանչյուր գարնանամուտ, որ հողի ընդերքից բույսեր է ծլարձակում, պարզաբանում է ինձ մահվան ահավոր առեղծվածը ու փարատում հավիտենական քնի իմ տագնապալի երկյուղը:

 

Մահացած թրթուրից վերակենդանացած թիթեռնիկի թևածելը օդում` դիպուկ խորհրդանշանն է մեր անմահության:

 

Սերը գեղեցկագույն Երևույթն է հոգեպարար արարչության, ամենազոր մագնիսն է Ոգեաշխարհում, ակունքը ակնածանքի ու վեհ առաքինության: Ես խոստովանում եմ անկեղծորեն` ես հավատում եմ անշահախնդիր սիրո իրականությանը: Այն ոգին, որ միայն իրեն է սիրում, լողացող ատոմ է անընդգրկելի դատարկ տարածություններում: Թող մենք գիտակցենք կատարելությունը և այն կլինի մերը:

 

Մերձենանք բարձր իդեալական միասնությանը և կմիաբանվենք եղբայրասիրությամբ: Թող պայծառամիտ լինենք և մենք կսիրենք կրակոտ:

 

 

Գերմաներենից թարգմանությունը`

Տիգրան Աբելյանի